ᕿᒥᑦᕈᐊᖅᑕᐅᓇᓱᐊᖅᑐᑦ ᓇᓗᓇᐃᖅᑐᖅᑕᐅᔪᑦ

ᓄᓇᖃᖅᑳᖅᑎᑦ ᐃᖃᓗᒃᓯᐅᖅᑐᓕᕆᓃ’ᓄᑦ ᖃᓄᕐᓕᐅᕈᓯᒃᓴᑦ

ᐅᓇ ᐊᐅᓚᑕᐅᔪᖅ ᐃᑲᔫᑕᐅᓇᓱᐊᖅᖢᓂ ᓄᓇᖃᖅᑳᖅᑎᐅᔪᓄᑦ ᐃᖃᓗᒃᓯᐅᕐᓂᖃᑦᑎᐊᖁ’ᓗᒋᑦ ᓂᕆᔭᒃᓴᓂᒃ, ᓂᕆᕕᒡᔪᐊᖃᑎᒌᖕᓂᕐᒧᓪᓗ, ᐅᒃᐱᕆᔭᑐᖃᐃ’ᓂᒡᓗ ᐱᑦᖁᓯᑐᖃᕐᓂᒃ ᒪᓕᒃᖢᑎᒃ. ᓴᓇᓂᕐᒧᓪᓗ ᓄᓇᓖᑦ ᐃᖃᓗᒃᓯᐅᖅᑐᓕᕆᓕᒃᑯᑦ ᐃᓚᐅᖃᑕᐅᑎᑕᐅᓇᓱᐊᖅᐸᒃᑐᑦ. ᓲᕐᓗ ᖃᐅᔨᓴᖅᑐᓕᕆᖃᑕᐅ’ᓗᑎᒃ ᖃᑉᓯᐅᓂᖏ’ᓂᒃ ᓈᓴᐃ’ᓗᑎᒃ, ᐃᖃᓗᐃᓪᓗ ᓇᔪᕐᕕᖏ’ᓂᒃ ᑲᒪᖃᑕᐅ’ᓗᑎᒃ, ᖃᐅᔨᓴᖃᑕᐅ’ᓗᑎᒃ ᐃᖃᓗᒃᓯᐅᖅᑐᓂᒃ ᒪᓕᒐᑎᒎᕆᐊᒃᓴᐃᑕ ᐃᖃᓗᒃᓯᐅᕐᓂᒃᑯᑦ ᐃᖃᓗᒃᑕᕆᔭᐅᔪᓪᓗ ᓱᓕᔪᒥᒃ ᐊᑐᖅᑕᐅᒋᐊᒃᓴᐃᑕ ᓂᕿᓄᑦ, ᓂᕆᕕᒡᔪᐊᖃᑎᒌᖕᓂᕐᒧᓪᓗ, ᐱᖅᑯᓯᑐᖃᑎᒍᓪᓗ.

ᐊᖏᕐᓂᓕᐅᖅᓯᒪᔪᑦ 125-ᕋᓗᖕᓂᒃ ᐅᑭᐅᖅ ᑕᒫᑦ ᓄᓇᖃᖅᑳᖅᑐᑦ ᐃᖃᓗᒃᓯᐅᖅᑐᓂᕆᓂᒃᓴᐃ’ᓄᑦ ᖃᓄᕐᓕᐅᕈᓯᒃᓴᑦ ᐱᒋᐊᕐᓂᖏ’ᓂᒃ 1992-ᒥ. ᐊᖏᕈᑎᑦ ᐊᒥᓱᓛᖏᑦ ᑲᓇᑕᐅᑉ ᐅᐊᖕᓇᖓᓃᑦᑐᑦ, ᐊᓯᖏᓪᓗ ᐃᒃᑭᓐᓂᖅᓴᐅ’ᓗᑎᒃ ᑲᓇᑕᐅᑉ ᑲᖏᐊᓂ ᑯᐸᐃᖕᒥᓗ. ᑲᓇᑕᐅᑉ ᐅᐊᖕᓇᖓᓂ 95-ᖑᔪᑦ ᑮᓇᐅᔭᖃᖅᑎᑦᑎᓪᓗᑎᒃ ᐃᖃᓗᒃᓯᐅᖅᑐᓕᕆᓂᕐᒧᑦ ᐃᑦᕿᓖᑦ ᓄᓇᐃ’ᓄᑦ 165-ᖑᔪᓄᑦ.

 ᓯᓚᑖᒍᑦ ᐅᖃᓕᒫᒐᒃᓴᑦ ᐊᐅᓚᑕᐅᔪᑦ ᒥᒃᓵ’ᓄᑦ

 

ᓄᓇᖃᖅᑳᖅᑎᑦ ᐃᖃᓗᒃᓯᐅᖅᑐᓕᕆᓂᕐᒧᑦ ᓴᐳᑦᔨᔨᖃᕐᓂᖏ’ᓂᒃ

ᑕᓴᒻᒪ ᐊᐅᓚᑕᐅᔪᖅ ᖃᓄᕐᓕᐅᕈᓯᒃᓴᑎᒍᑦ ᓄᓇᖃᖅᑳᖅᑐᑦ ᐃᖃᓗᒃᓯᐅᖅᑐᓂᕆᓂᒃᓴᐃ’ᓄᑦ. ᐱᒋᐊᖅᑎᑕᐅᓯᒪᓕᖅᑐᖅ ᐃᑲᔫᑕᐅᓂᐊ’ᒪᑦ ᓄᓇᖃᖅᑳᖅᑎᑦ ᖃᐅᔨᓴᕐᓂᕐᒧᑦ ᐃᓚᐅᖁ’ᓗᒋᑦ ᓈᓴᐃᓂᕐᒧᑦ ᐃᖃᓗᐃᓪᓗ ᓇᔪᕐᕕᖏ’ᓂᒃ ᑲᒪᖃᑕᐅᓂᕐᒥᒃ. ᖃᐅᔨᓴᖃᑕᐅ’ᓗᑎᒡᓗ ᐃᖃᓗᒃᓯᐅᖅᑐᓂᒃ ᒪᓕᒐᑎᒎᕆᐊᒃᓴᐃᑕ ᐃᖃᓗᒃᓯᐅᕐᓂᒃᑯᑦ ᐃᖃᓗᒃᑕᕆᔭᐅᔪᓪᓗ ᓱᓕᔪᒥᒃ ᐊᑐᖅᑕᐅᒋᐊᒃᓴᐃᑕ ᓂᕿᓄᑦ, ᓂᕆᕕᒡᔪᐊᖃᑎᒌᖕᓂᕐᒧᓪᓗ, ᐱᖅᑯᓯᑐᖃᑎᒍᓪᓗ.

 

ᓄᓇᖃᖅᑳᖅᑎᓄᑦ ᐃᒪᕐᒥᐅᑕᓕᕆᓂᕐᒧᑦ ᑕᕆᐅᓕᕆᓂᕐᒧᓐᓗ ᐊᐅᓚᑕᐅᔪᑦ

ᐅᓇ ᐱᒋᐊᖅᑎᑕᐅᔪᖅ 2004-ᒥ ᐃᑲᔫᑕᐅᖁ’ᓗᒍ ᓄᓇᖃᖅᑳᖅᑎᓂᒃ ᐃᒪᕐᒥᐅᑕᓂᒃ ᑕᕆᐅᕐᒥᒡᓗ ᑲᒪᔨᐅᖃᑎᒌᒃᑐᖃᖁ’ᓗᒋᑦ ᐊᕙᑎᐅᑉ ᒥᒃᓵ’ᓂ ᑰᑉᓘᓐᓃᑦ ᐊᑯᐊᒍᑦ ᐃᑲᔪᖅᑕᐅ’ᓗᑎᒡᓗ ᐃᓕᑦᑎᓯᒪᔪᓂᑦ ᐃᖃᓗᒃᓯᐅᖅᑐᓕᕆᓂᕐᒧᑦ, ᖃᐅᔨᓴᖅᑏᓪᓗ ᐆᒪᔪᓂᒃ, ᖃᕆᓴᐅᔭᒃᑰᖅᑐᓕᕆᔨᓂᒡᓗ. ᓴᑉᑯᐊᖅ ᓴᓇᔨᑦ ᖃᐅᔨᓴᖃᑦᑕᖅᑐᑦ ᐊᕙᑎ ᑲᒪᒋᔭᐅᑦᑎᐊᖁ’ᓗᒍ. ᐃᓚᐅᖃᑦᑕᖅᑐᓪᓗ ᐅᖃᐅᑦᔪᐃᖃᑕᐅᓂᕐᒧᑦ ᐃᓱᒪᓕᐅᖃᑕᐅᓂᕐᒧᓪᓗ ᐃᒪᕐᒥᐅᑕᐃᑦ ᑕᕆᐅᕐᓗ ᑲᒪᒋᔭᐅᑦᑎᐊᕐᓂᒃᓴᐃ’ᓄᑦ.

ᐊᐅᓚᑕᐅᔪᒃᑯᑦ ᐃᑲᔪᖅᑎᒌᖕᓂᖃᖅᑎᑦᑎᑦᑎᐊᕋᓱᐊᖅᑐᑦ ᓄᓇᓕᖕᓂ. ᑕᑦᕙ 35-ᓂᒃ ᐊ’ᔨᒌᙱᑦᑐᓂᒃ ᑲᒪᔨᐅᖃᑎᒌᕋᓛᖃᖅᑐᑦ ᐊᐅᓚᑕᐅᔪᑎᒍᑦ ᐃᒪᕐᒥᐅᑕᓕᕆᓂᕐᒧᑦ ᑕᕆᐅᓕᕆᓂᕐᒧᓪᓗ, ᐃᓚᐅᑎᑦᑎ’ᓗᑎᒃ ᓄᓇᓕᖕᓂᒃ 258-ᓂᒃ ᓄᓇᖃᖅᑳᖅᑎᐅᔪᓂᒃ. ᐃᓚᖏᓪᓗ ᑲᒪᔨᐅᕕᖃᖅᑐᑦ ᐊᑕᐅᓯᐅᙱᑦᑐᒥᒃ.

ᓯᓚᑖᒍᑦ ᐅᖃᓕᒫᒐᒃᓴᑦ ᐊᐅᓚᑕᐅᔪᑦ ᒥᒃᓵ’ᓄᑦ

 

ᑲᓇᑕᐅᑉ ᑲᖏᐊᓂ ᐃᖃᓗᒃᓯᐅᖅᑐᓕᕆᓂᕐᒧᑦ ᑮᓇᐅᔭᓕᐅᖃᑕᐅᓂᕐᒧᑦ

ᐅᓇ ᐊᐅᓚᑕᐅᔪᖅ ᐃᑲᔫᑕᐅᓇᓱᐊᖅᖢᓂ ᐃᑦᕿᓕᕐᓂᒃ ᑕᐃᔭᐅᔪᓂᒃ ᒥᒡᒫᓂᒃ ᒪᓚᓯ’ᓂᒡᓗ ᑲᓇᑕᐅᑉ ᖃᖏᐊᓂ ᓂᐅ ᐳᕋᓐᓱᐃᒃᒥ, ᐲᐄᐊᐃᒥ, ᓅᕙᓯᑰᓴᒥ, ᒐᔅᐸᐃᒥᓗ ᑯᐸᐃᖕᒥ, ᓇ’ᒥᓂᖁᑎᖃᖁ’ᓗᒋᑦ ᐃᖃᓗᒃᓯᐅᕈᑎᓂᒃ ᑮᓇᐅᔭᓕᐅᕈᑎᖃᖁ’ᓗᒋᑦ ᐃᖃᓗᒃᓯᐅᕐᓂᒃᑯᑦ ᐊᒻᒪ ᐃᓚᐅᑦᑎᐊᖁ’ᓗᒋᓪᓗ ᐃᖃᓗᒃᓯᐅᖅᑐᓕᕆᓂᕐᒧᑦ.

ᐃᓚᐅᔪᖕᓇᖅᑐᑦ ᓄᓇᓖᑦ 34-ᖑᒐᓗᐊᑦ ᐊᒻᒪ ᑖᑉᑯᓇ’ᖓᑦ 33-ᖏᓐᓂᒃ ᐃᓚᐅᓯᒪᔪᑦ. ᑮᓇᓕᐅᖃᑎᒌᒃᐸᒃᑐᑦ ᐅᑭᐅᑉ ᐃᓗᐊᓂ $110-ᒥᓕᐊᓐᓂᒃ ᓴᓇᑎᑦᑎ’ᓗᑎᒃ 1,675-ᓂᒃ ᐃᓄᖁᑎᖏ’ᓂᒃ.

ᓯᓚᑖᒍᑦ ᐅᖃᓕᒫᒐᒃᓴᑦ ᐊᐅᓚᑕᐅᔪᑦ ᒥᒃᓵ’ᓄᑦ

 

ᑲᓇᑕᐅᑉ ᐅᐊᓕᓂᐊᓂ ᐃᖃᓗᒃᓯᐅᖅᑐᓕᕆᓂᕐᒧᑦ ᑮᓇᐅᔭᓕᐅᖃᑕᐅᓂᕐᒧᑦ

ᐊᐅᓚᑕᐅᔪᒃᑯᑎᒍᑦ ᐃᓚᐅᑎᑦᑎᓇᓱᐊᖅᑐᑦ ᓄᓇᖃᖅᑳᖅᑎᓂᒃ ᐳᕆᑎᔅ ᑲᓚᒻᐱᐊᒥ (ᐲᓰᒥ), ᓇ’ᒥᓂᖁᑎᖃᖁ’ᓗᒋᑦ ᐃᖃᓗᒃᓯᐅᕈᑎᓂᒃ ᑮᓇᐅᔭᓕᐅᕈᑎᖃᖁ’ᓗᒋᑦ ᐃᖃᓗᒃᓯᐅᕐᓂᒃᑯᑦ ᐊᒻᒪ ᐃᓚᐅᑦᑎᐊᖁ’ᓗᒋᓪᓗ ᐃᖃᓗᒃᓯᐅᖅᑐᓕᕆᓂᕐᒧᑦ.

ᓇ’ᒥᓂᓖᑦ 25-ᖑᕗᑦ ᑖᑉᓱᒧᖓ ᐊᐅᓚᑕᐅᔪᒧᑦ ᐃᓚᐅᓯᒪᔪᑦ, ᓄᓇᓕᖕᓂᙶᑐᑦ 97-ᖏᓐᓂ, ᑲᑎᖦᖢᒋᑦ ᓄᓇᓕᖏᑦ ᐲᓰᒥ 202-ᖑᒐᓗᐊᖅᑎ’ᓗᒋᑦ. ᓇ’ᒥᓂᖏᑦ ᐃᖃᓗᒃᓯᐅᕐᓂᖏᑦ ᐊᐅᓚᑦᑎᐊᖅᑐᑦ ᐅᑭᐅᖅ ᑕᒫᑦ $40.2-ᒥᓕᐊᓐᓂᒃ ᑮᓇᐅᔭᓕᐅᖃᑎᒌᒃᐸᒃᖢᑎᒃ ᓴᓇᑎᑦᑎ’ᓗᑎᒡᓗ ᐃᓄᖕᓂᒃ 1,100-ᓂᒃ.

ᓯᓚᑖᒍᑦ ᐅᖃᓕᒫᒐᒃᓴᑦ ᐊᐅᓚᑕᐅᔪᑦ ᒥᒃᓵ’ᓄᑦ

 

ᑲᓇᑕᐅᑉ ᐅᑭᐅᖅᑕᖅᑐᐊᓂ ᐃᖃᓗᒃᓯᐅᖅᑐᓕᕆᓂᕐᒧᑦ ᑮᓇᐅᔭᓕᐅᖃᑕᐅᓂᕐᒧᑦ

ᐊᐅᓚᑕᐅᔪᒃᓴᖅ ᐅᓇ ᑮᓇᐅᔭᖃᖅᑎᑦᑎᓂᐊᖅᑐᖅ ᐃᑲᔪᖅᑕᐅᓂᖃᖅᑎᑦᑎ’ᓗᑎᒃ ᐅᑭᐅᖅᑕᖅᑐᒥᐅᑕᐃᑦ ᐃᓄᐃᑦ ᓄᓇᓖ’ᓄᑦ ᐃᓚᐅᕕᖃᙱᓲᑕᕆᓂᖏ’ᓄᑦ ᑲᓇᑕᐅᑉ ᑲᖏᐊᓂ ᐅᐊᖕᓇᖓᓂᓗ ᐃᓚᒋᔭᐅᙱ’ᒪᑕ.1 ᑮᓇᐅᔭᖅᑖᕆᔭᐅᔭᒃᓴᑦ ᑐᕌᖓᓂᐊᖅᑐᑦ ᐃᖃᓗᒃᓯᐅᕐᓂᒃᑯᑦ ᓇ’ᒥᓂᖃᖅᑎᑦᑎᓂᕐᒧᑦ ᐃᒪᕐᒥᐅᑕᓕᕆᓂᕐᒧᓪᓗ, ᐊᑦᖁᓇᐅᑎᖃᕐᓗᑎᒃ ᓇ’ᒥᓂᓕᕆᓂᕐᒧᑦ ᐱᕙᓪᓕᐊᑎᑦᑎᓂᕐᒥᒡᓗ ᐃᓕᓴᐅ’ᔨᓂᕐᒥᒡᓗ. ᒪᓕᖕᓂᐊᖅᑑᒐᓗᐊᖅ ᐊᐅᓚᑕᐅᔪᓂᒃ ᑲᓇᑕᐅᑉ ᑲᖏᐊᓂ ᐅᐊᓕᓂᐊᓂᓗ ᑭᓯᐊᓂᑦᑕᐅᖅ ᓴᓇᔭᐅᓂᐊᖅᑐᖅ ᐅᑭᐅᖅᑕᖅᑐᒥᐅᑕᐃᑦ ᐱᒋᐊᖃᖅᑕᐃ’ᓂᒃ ᐊ’ᔨᒋᔭᐅᙱᓐᓂᖏᓪᓗ ᐅᑦᔨᕆᔭᐅᑦᑎᐊᕋᓱᐊᕐᓗᓂ.